Kunwar Mahendra Singh Bedi Sahar
ḳhushi yaad aa.i ki gham yaad aa.e
magar tum hamen dam-ba-dam yaad aa.e
jo tum yaad aa.e to gham yaad aa.e
jo gham yaad aa.e to ham yaad aa.e
chhiḌa zikr jab un ke jaur-o-sitam ka
mujhe un ke lakhon karam yaad aa.e
mohabbat men ik vaqt aisa bhi guzra
na tum yaad aa.e na ham yaad aa.e
falak par jo dekhe mah-o-mehr-o-anjum
hamen apne naqsh-e-qadam yaad aa.e
muqaddar ko jab bhi sanvara hai ham ne
tiri zulf ke pech-o-ḳham yaad aa.e
ajab kashmakash hai ki jiina na marna
‘sahar’ us se kah do ki kam yaad aa.e
Leave a Reply