Reincarnation

Maimoona Abbas Khan

mire angan men bikhre zard patte

mujhe hamraz lagte hain

ye jab halki hava ki sarsarahat se larazte hain

to yuun lagta hai jaise

un pe koi bhed sa khulne laga hai

jaise un ko bavar ho gaya hai

ki khud shakhon ne be-parvai se daman chhudaya hai

zamin ne bhi nigahen pher li hain

unhen malum hai shayad

zamin pairon tale hi jab na ho to

jitna marzi sar patakh len

tahniyon ko thaam len

be-faeda hai

ab unhen be-asra rahna padega

kabhi pairon men aa kar charmarana

hava ke dosh par udte

bikharte hi chale jaana padega

vajud apna kisi gumnam goshe men chhupa kar raigani ki aziyyat un ko sahte hi chale jaana padega

khayal aata hai

kitni be-nishan be-mol be-vaqat si un ki zindagi hai

magar ye be-nishani jin khalaon ko janam deti hai

unhen bharne ko jivan konpalon se akhir ik din phutta hai

yahi ik soch mujh ko

apne angan men bikharte charmarate zard patton se

bahut manus rakhti hai

bahut nazdik rakhti hai