aaj divane ka zauq-e-did puura ho gaya
tujh ko dekha aur us ke ba.ad andha ho gaya
dhuup ke hathon pe bai.at kar chuki hain Tahniyan
rang saare sabz patton ka sunahra ho gaya
kaan dharta hi nahin koi miri avaz par
aisa lagta hai ki saara shahr murda ho gaya
saya-e-divar ko oḌhe hue the sab ke sab
gir ga.i divar ghar ka ghar barhana ho gaya
jism o jaan par sozish-e-gham ka hua yaksan asar
suraten sanvla ga.iin jab dard gahra ho gaya
ḳhvahishati irtiqa men dab ga.i hai shaḳhsiyat
nafs moTa ho gaya aur shaḳhs dubla ho gaya
zindagi ki yatra men saath kya chhuTa tira
muḳhtasar sa rasta pal-bhar men lamba ho gaya
‘ghalib’-e-dana se puchho ishq men paḌ kar salim
ek ma.aqul aadmi kaise nikamma ho gaya
Leave a Reply