Gham Ki Saughat Hai KHamoshi Hai

ġham kī sauġhāt hai ḳhamoshī hai

chāñdnī raat hai ḳhamoshī hai

maiñ akelā nahīñ ki bāteñ hoñ

vo mire saat hai ḳhamoshī hai

merī barbādiyoñ kī sāzish meñ

zabt kā haat hai ḳhamoshī hai

kaisā aaseb hai ki har jānib

jashn-e-jazbāt hai ḳhamoshī hai

vaqt ke zaḳhm zaḳhm hoñToñ par

an-kahī baat hai ḳhamoshī hai

phir usī tarah garm māthe par

kāñptā haath hai ḳhamoshī hai

sub.h-e-nau ho ki shām-e-ġham ‘aslam’

gosha-e-zāt hai ḳhamoshī hai

Leave a Comment