Zeeshan Sahil
jo mere bas men hai us se ziyada kya karna
safar to karna hai us ka irada kya karna
bas ek rang hai dil men kisi ke hone se
ab apne-ap ko is se bhi saada kya karna
jab apni aag hi kaafi hai mere jiine ko
to mahr o maah se bhi istifada kya karna
tire labon ke siva kuchh nahin mayassar jab
so fikr-e-saghar-o-saqi-o-bada kya karna
tamam kashtiyan sahil pe hain abhi Thahri
abhi se in ko jalane ka va.ada kya karna
Leave a Reply