Jaan Le Le Na Zabt-E-Ah Kahin

Bakul Dev

jaan le le na zabt-e-ah kahin

ro liya kiije gaah gaah kahin

ibtida.i jo ek ḳhadsha tha

khul na jaa.e usi pe raah kahin

hone vaali hai ye faza rangin

abr hone lage siyah kahin

ye suhulat hai zindagi ko bahut

rabt hota rahe nibah kahin

aur kuchh der gham nazar men rakh

kya ḳhabar mil hi jaa.e thaah kahin

haif sar se guzar gaya paani

dhone aa.e the ham gunah kahin