Naushad Ali
sab kuchh sar-e-bazar jahan chhoḌ gaya hai
ye kaun khuli apni dukan chhoḌ gaya hai
jaate hi kisi ke na vo naghma na ujala
ḳhamosh charaghon ka dhuan chhoḌ gaya hai
vahshi to gaya le ke vo zanjir-o-gareban
ik nauha-kunan ḳhali makan chhoḌ gaya hai
sau qafile is raah se aa.e bhi ga.e bhi
ab tak main vahin huun vo jahan chhoḌ gaya hai
bheja hai ye kis ne varaq-e-sada mire naam
kya kya gile be-lafz-o-bayan chhoḌ gaya hai
ta-dur jahan ab se sar-e-rah charaghan
vo naqsh-e-qadam apne vahan chhoḌ gaya hai
uTh kar tiri mahfil se gaya hai jo mughanni
naghmat ke parde men fughan chhoḌ gaya hai
be-samt sa ik aaj ki maazi hai na farda
ye vaqt ka sailab kahan chhoḌ gaya hai
pahlu men kahan dil jo sambhale koi ‘naushad’
ik daagh ki surat men nishan chhoḌ gaya hai
Leave a Reply