ḳhal-e-mashshata bana kajal ka chashm-e-yar par
zaagh ko bahr-e-tasadduq rakh sar-e-bimar par
mujh ko rahm aata hai dast-e-nazuk-e-dildar par
main hi rakh dunga gala ai hamdamo talvar par
be-suvaida haath dil mat Daal zulf-e-yar par
maash pahle padh ke mantar phenk ru-e-yar par
gar hifazat ruḳh ki hai manzur to mitva na ḳhat
baghban rakhta hai kante baagh ki divar par
kaun kahta hai ki sabza aag par ugta nahin
ḳhat hai paida yaar ke dekho ruḳh-e-gulnar par
dekh mizhgan par miri tughyani-e-sail-e-sarishk
nuuh ka tufan na dekha hove jis ne ḳhaar par
jis ko dekha hi nahin us ke vatan men qadr-e-ḳhak
baagh se ho kar juda pahunche hai gul dastar par
haq agar puchho to ejaz-e-sar-e-mansur tha
varna lagna tha taajjub phal ka naḳhl-e-dar par