Rawish Rawish Pe Hain Nikhat-Fashan Gulab Ke Phul

ravish ravish pe hain nik.hat-fashan gulab ke phuul

hasin gulab ke phuul arghavan gulab ke phuul

jahan-e-girya-e-shabnam se kis ghurur ke saath

guzar rahe hain tabassum-kunan gulab ke phuul

ye mera daman-e-sad-chak ye rida-e-bahar

yahan sharab ke chhinTe vahan gulab ke phuul

ḳhayal-e-yar tire silsile nashon ki ruten

jamal-e-yar tiri jhalkiyan gulab ke phuul

miri nigah men daur-e-zaman ki har karvaT

lahu ki lahr dilon ka dhuan gulab ke phuul

sulagte jaate hain chup-chap hanste jaate hain

misal-e-chehra-e-paighambaran gulab ke phuul

ye kya tilism hai ye kis ki yasmin banhen

chhiḌak ga.i hain jahan-dar-jahan gulab ke phuul

kaTi hai umr baharon ke sog men ‘amjad’

miri lahad pe khilen javedan gulab ke phuul