Sabeela Inam Siddiqui
jahan men jis ki shohrat ku-ba-ku hai
vo mujh se aaj mahv-e-guftugu hai
raha abad ḳhvabon men jo ab tak
ḳhusha qismat ki ab vo ru-ba-ru hai
kabhi vo pyaar se ik phuul laa.e
bahut din se miri ye aarzu hai
nahin aata ghazal men naam koi
ta.alluq is qadar ba-abru hai
mira ehsas jis se hai mo.attar
vahi ḳhushbu to mere char-su hai
sarapa mera jo hai itna rangin
ye us ki yaad ka hi rang-o-bu hai
jahan kal tak tha mayusi ka sahra
vahan ummid ki ik aabju hai
vo avazen jo dil men gunjti hain
miri anfas ki vo hav-hu hai
mujhe le jaa.e jo manzil ki janib
ab aise karvan ki justuju hai
mira zahir nazar aata hai jaisa
mira batin bhi vaisa hu-ba-hu hai
‘sabila’ soch itni paak rakkhi
har ik mazmun mera ba-vazu hai
Leave a Reply