ab har ik dard ko us dard ki lazzat jaano
aur ankhon ko kisi ḳhvab ki qimat jaano
sab parindon ko isi yaad ka maz.har samjho
saari ḳhushiyon ko usi gham ki alamat jaano
husn duniya ko isi shakl ka partav samjho
zindagi us ki hi yadon ki amanat jaano
kaun milta hai kise sirf mohabbat ke tufail
vo bichhaḌ jaa.e to us ko hi haqiqat jaano
har na.e phuul ko mausam ka karishma samjho
har na.e dasht ko badal ki siyasat jaano
DhunDte jaao akele sar-e-sahra-e-hayat
dasht-e-tanha ko magar us ki rifaqat jaano
apne sab hijr to sachche nahin hote hain magar
alam-e-hijr men yadon ko ibadat jaano
ik nafas bhi to nahin ishq ka rasta ‘adil’
ek lamhe ki mohabbat ko ghanimat jaano
Leave a Reply