Makhmoor Saeedi
lafzon ke siyah pairahan men lipTi hui kuchh tanviren hain
ai dida-varo pahchano to kis haath ki ye tahriren hain
jaati hui rut kab rukti hai ai dil ye abas tadbiren hain
jo qaid havaon ko kar len kya aisi bhi kuchh zanjiren hain
naghma vo kis ne chheḌa hai bichhḌe hue gham sab aan mile
avaz ki lahron par larzan sau mohr-ba-lab tasviren hain
avara hava ke jhonkon par akasr ye guman guzra jaise
ye ham se preshan-halon ki be-samt-o-jehat taqdiren hain
is shahr men le kar aa.e hain ham shabnam-o-gul ki saughaten
ankhon men jahan angare hain hathon men jahan shamshiren hain
kuchh ḳhvab ujalon ke ham ne dekhe the magar ta-hadd-e-nazar
jo zulmat ban kar phail ga.iin kin ḳhvabon ki ta.abiren hain
kyuun aaj ki jani-pahchani shaklon se nazar manus nahin
ankhon men jo phirti rahti hain kis daur ki ye tasviren hain
ham apni zaat ke zindan se bahar jo nikal aa.e bhi to kya
qadmon se jo lipTi paḌti hain rahen ye nahin zanjiren hain
Leave a Reply