main huun vo aankh jise ḳhun-e-jigar le Duube
main vo naala huun jise us ka asar le Duube
main huun vo raat sitare jise gahra kar den
main huun vo bazm jise raqs-e-sharar le Duube
vo mai-e-tund huun main jis se jigar char jaa.e
main vo dariya huun jo apna hi guhar le Duube
vo sanam main ne tarashe ki ḳhuda chaunk uThe
main vo aazar huun jise mashq-e-hunar le Duube
gard ko bhi na pahunch sakte the rahzan jin ki
unhin manzil se bhi aage ke safar le Duube
vo jo phirte the ḳhabar tirgiyon ki lete
idhar aa.e to ka.i chand udhar le Duube
kaise ḳhamosh andheron men chhupe baiThe hain
aise andher ki ummid-e-sahar le Duube
ibn-e-adam ki to bu tak na rahi galiyon men
meri basti ko ḳhudaon ke ye ghar le Duube
nam-levaon ko apne kabhi ḳhalvat men parakh
is tamashe ko yahi sho.abda-gar le Duube
mere hamraz ne kya ḳhuub kaha tha ‘rahil’
tujhe mumkin hai yahi zauq-e-nazar le Duube
Leave a Reply