aftab-iqbal-shamim

Ye Jo Thahra Hua Manzar Hai Badalta Hi Nahin

ye jo thahra hua manzar hai badalta hi nahin

vaqia parda-e-saat se nikalta hi nahin

aag se tez koi chiiz kahan se laun

mom se narm hai vo aur pighalta hi nahin

ye miri khams-havasi ki tamasha-gahen

tang hain un men mira shauq bahalta hi nahin

paikar-e-khak hain aur khaak men hai saql bahut

jism ka vazn talab ham se sambhalta hi nahin

ghaliban vaqt mujhe chhod gaya hai pichhe

ye jo sikka hai miri jeb men chalta hi nahin

ham pe ghazlen bhi namazon ki tarah farz huiin

qarz na-khvasta aisa hai ki talta hi nahin

More Poems

Leave a Comment