ab itni sadgi laaen kahan se
zamin ki khair mangen asman se
agar chahen to vo divar kar den
hamen ab kuchh nahin kahna zaban se
sitara hi nahin jab saath deta
to kashti kaam le kya badban se
bhatakne se mile fursat to puchhen
pata manzil ka mir-e-karvan se
tavajjoh barq ki hasil rahi hai
so hai azad fikr-e-ashiyan se
hava ko raz-dan ham ne banaya
aur ab naraz khushbu ke bayan se
zaruri ho gai hai dil ki zinat
makin pahchane jaate hain makan se
fana-fil-ishq hona chahte the
magar fursat na thi kar-e-jahan se
vagarna fasl-e-gul ki qadr kya thi
badi hikmat hai vabasta khizan se
kisi ne baat ki thi hans ke shayad
zamane bhar se hain ham khud guman se
main ik ik tiir pe khud Dhaal banti
agar hota vo dushman ki kaman se
jo sabza dekh kar kheme lagaen
unhen taklif kyuun pahunche khizan se
jo apne ped jalte chhod jaaen
unhen kya haq ki ruthen baghban se