be-muravvat bevafa na-mehrban na-ashna
jis ke ye ausaf koi us se ho kya ashna
tang ho saae se apne jis ko ho na-ashna
vo but-e-vahshi-e-tabiat kis ka hoga ashna
vaah vaah ai dil-bar-e-kaj-fahm yunhi chahiye
ham se ho na-ashna ghairon se hona ashna
bad-mizaji na-khushi azurdagi kis vaste
gar bure ham hain to ho jiye aur se ja ashna
ye sitam ye dard ye gham aur alam mujh par hua
kaash ki tujh se main ai zalim na hota ashna
ne tarahhum ne karam ne mehr hai ai bevafa
kis tavaqqo par bhala ho koi tera ashna
ashna kahne ko yuun to aap ke hovenge sau
par koi ai mehrban aisa na hoga ashna
khair-khvah o mukhlis o fidvi jo kuchh kahiye so huun
aib kya hai gar rahe khidmat men mujh sa ashna
ashnai ki tavaqqoa kis se ho ‘bedar’ phir
ho gaya begana jab aisa hi apna ashna
Leave a Reply