puchho na kuchh subut-e-ḳhirad main ne kya diya
ek mast-e-naz ko dil-e-be-mudda.a diya
ab kya gila karun adam-e-iltifat ka
meri nigah-e-yas ne sab kuchh jata diya
baḌhte hue shu.ur men gum ho raha huun main
ehsas-e-husn aap ne itna baḌha diya
dekhi na jab tajalli-e-takrar-ashna
be-rangiyon ka rang ḳhudi ne jama diya
hai shaad be-dili pe tahi-dast-e-arzu
achchha kiya nishan-e-tamanna miTa diya
mayus-e-jalva-ha-e-tarab huun ḳhabar nahin
dil ḳhud hi bujh gaya ki kisi ne bujha diya
kya lutf-e-iztirab dikha.un ki aap ne
ehsa-e-dard dard se pahle miTa diya
anjam-e-did-o-eid ab ai ham-nashin na puchh
vo mujh ko yaad hai mujhe jis ne bhula diya
ma.alum tha tujhe ki vo dard-ashna nahin
‘manzur’ dil ka dard unhen bhi suna diya
Leave a Reply