Tere Dar Par Maqam Rakhte Hain

Poet

tere dar par maqam rakhte hain

qasd-e-dar-us-salam rakhte hain

ibtida apni intiha se pare

na-tamami tamam rakhte hain

asman se kise umid-e-najat

ashiyan zer-e-dam rakhte hain

ek yusuf ki saath ghurbat men

aise lakhon ghulam rakhte hain

be-baha shai huun main ki vo mujh ko

na-ḳharida ghulam rakhte hain

sab ki sunte hain karte hain ji ki

kaam se apne kaam rakhte hain

vasl-e-ma.ashuq hai sulaimani

vo hi jam hain jo jaam rakhte hain

kuchh tiri dosti ki qadr nahin

dushmani ḳhas-o-am rakhte hain

qais o farhad kahte hain vo mujhe

kaise gin gin ke naam rakhte hain

nalon ko rok rok lete hain

dil ko ham thaam thaam rakhte hain

ka.abe men ek dam ki mehmani

mai-kade men mudam rakhte hain

dil-ruba kahne se vo chaunk uThe

goya ham ittiham rakhte hain

chashm-e-bad-dur aish-e-ahd-e-shabab

sub.h ham-rang-e-sham rakhte hain

ai ‘qalaq’ baiThiye sar-e-ḳhum-e-mai

aap aali maqam rakhte hain