Habeeb Ahmad Siddiqui
ye gham nahin hai ki ab ah-e-na-rasa bhi nahin
ye kya hua ki mire lab pe iltija bhi nahin
sitam hai ab bhi umid-e-vafa pe jiita hai
vo kam-nasib ki sha.ista-e-jafa bhi nahin
nigah-e-naz-e-ibarat hai zindagi jis se
sharik-e-dard to kya dard-ashna bhi nahin
samajh raha huun amanat mata-e-sabr ko main
agarche ab nigah-e-sabr-e-azma bhi nahin
vo karvan-e-nishat-o-tarab kahan hamdam
jo DhunDhiye to kahin koi naqsh-e-pa bhi nahin
hai dil ke vaste sham-e-umid-o-mash.al-o-rah
vo ik nigah jise dil se vasta bhi nahin
koi tabassum-e-jan-baḳhsh ko tarasta hai
shahid-e-ishva-e-rangin ka ḳhun-baha bhi nahin
ye kyuun hai sho.ala-e-betab ki tarah muztar
miri nazar ki abhi lutf-ashna bhi nahin
ba-shakl-e-qissa-e-dar-o-rasan na ho mash.hur
vo ik fasana-e-gham tum ne jo suna bhi nahin
tamam harf-o-hikayat miTa ga.i dil se
nigah-e-naz ne kahne ko kuchh kaha bhi nahin
vo kushta-e-karm-e-yar kya kare ki jise
ba-in tabahi-e-dil shikva-e-jafa bhi nahin
Leave a Reply