aankh bojhal hai
magar niind nahin aati hai
meri gardan men hamail tiri banhen jo nahin
kisi karvat bhi mujhe chain nahin padta hai
sard padti hui raat
mangne aai hai phir mujh se
tire narm badan ki garmi
aur darichon se jhijakti hui ahista hava
khojti hai mire gham-ḳhane men
teri sanson ki gulabi ḳhushbu!
mera bistar hi nahin
dil bhi bahut ḳhali hai
ik ḳhala hai ki miri ruuh men dahshat ki tarah utra hai
tera nanha sa vajud
kaise us ne mujhe bhar rakkha tha
tire hote hue duniya se taalluq ki zarurat hi na thi
saari vabastagiyan tujh se thiin
tu miri soch bhii, tasvir bhi aur boli bhi
main tiri maan, bhi tiri dost bhi ham-joli bhi
tere jaane pe khula
lafz hi koi mujhe yaad nahin
baat karna hi mujhe bhuul gaya!
tu miri ruuh ka hissa tha
mire charon taraf
chand ki tarah se raqsan tha magar
kis qadar jald tiri hasti ne
mire atraf men suraj ki jagah le li hai
ab tire gird main raqsinda huun!
vaqt ka faisla tha
tire farda ki rifaqat ke liye
mera imroz akela rah jaae
mire bachche, mire laal
farz to mujh ko nibhana hai magar
dekh ki kitni akeli huun main!