nazar ki fat.h kabhi qalb ki shikast lage
miri hayat para.e ka band-o-bast lage
na vo nuqush na husn-e-kashish ki baat rahi
sanam-farosh bhi jaise ḳhuda-parast lage
abhi mila tha abhi phir bichhaḌ gaya koi
ye hadsa bhi hikayat-e-bud-o-hast lage
farishte dekh rahe hain zamin o charḳh ka rabt
ye fasla bhi to insan ki ek jast lage
vahan safine ko pahuncha diya hai tufan ne
har ek mauj-e-bala ab jahan se past lage
tire hi gham ne kisi samt dekhne na diya
ki ab hujum-e-tamanna bhi tang-dast lage
jo teri bazm se ‘bekal’ chala to hosh men tha
ajiib baat hai ab vo bhi mast mast lage
Leave a Reply