Jab Teri Yaadon Ki Purwai Ghazal Gati Hai

jab tirī yādoñ kī purvā.ī ġhazal gaatī hai

phuul khil uThte haiñ tanhā.ī ġhazal gaatī hai

raqs kartī huī aatī hai tire jism kī yaad

terī TuuTī huī añgḌā.ī ġhazal gaatī hai

gudgudātī hai tasavvur ko tire ruup kī dhuup

mere jazbāt kī shahnā.ī ġhazal gaatī hai

ek muddat huī is raah se guzrā thā koī

aaj tak dil kī ye añgnā.ī ġhazal gaatī hai

naġhme sargoshī ke lahrāte haiñ panghaT panghaT

tohmateñ hañstī haiñ rusvā.ī ġhazal gaatī hai

jhuum jhuum uThtā hai saaqī tire ‘qaisar’ kā ḳhayāl

jab tirī āñkhoñ kī gahrā.ī ġhazal gaatī hai

Leave a Comment