jab tiri yadon ki purva.i ghazal gaati hai
phuul khil uThte hain tanha.i ghazal gaati hai
raqs karti hui aati hai tire jism ki yaad
teri TuuTi hui angḌa.i ghazal gaati hai
gudgudati hai tasavvur ko tire ruup ki dhuup
mere jazbat ki shahna.i ghazal gaati hai
ek muddat hui is raah se guzra tha koi
aaj tak dil ki ye angna.i ghazal gaati hai
naghme sargoshi ke lahrate hain panghaT panghaT
tohmaten hansti hain rusva.i ghazal gaati hai
jhuum jhuum uThta hai saaqi tire ‘qaisar’ ka ḳhayal
jab tiri ankhon ki gahra.i ghazal gaati hai
Leave a Reply