Jatinder Vir Yakhmi Jayaveer
janib-e-manzil safar men raushni si hai abhi
is andheri raat men bhi chandni si hai abhi
jo hamare dil men hai vo buujh lenge ḳhud kabhi
baat kya samjha.iye jo an-kahi si hai abhi
hai vahi dhaḌkan purani par miri sanson men kyuun
ik na.i ḳhushbu hai maano tazgi si hai abhi
kya vahi aa.egi le kar chilchilati dopahar
ik suhani dhuup jo lagti bhali si hai abhi
ho sake dohra.iye na baat jo sachchi lage
dushmani ban ja.egi jo dosti si hai abhi
Leave a Reply