Koi Aahat Koi Sargoshi Sada Kuchh Bhi Nahin

Bilqis Zafirul Hasan

koi aahat koi sargoshi sada kuchh bhi nahin

ghar men ik behis khamoshi ke siva kuchh bhi nahin

naam ik nayab sa likha tha vo bhi mit gaya

ab hatheli par lakiron ke siva kuchh bhi nahin

be-chhue ik lams ka ehsas ik khamosh baat

us ke mere biich akhir tha bhi kya kuchh bhi nahin

dosti kaisi vafa kaisi takalluf bartaraf

aap kuchh bhi hon magar kya dusra kuchh bhi nahin

dekhna ye hai ki milne kis se pahle kaun aae

mere ghar se us ke ghar ka fasla kuchh bhi nahin