Zara Bhi Jis Ki Wafa Ka Yaqin Aaya Hai

zarā bhī jis kī vafā kā yaqīn aayā hai

qasam ḳhudā kī usī se fareb khāyā hai

har ek kāfir-o-momin ke kaam aayā hai

vo har maqām jahāñ maiñ ne sar jhukāyā hai

bahut ġhurūr thā hosh-o-havās par lekin

nazar jab un se milī hai to hosh aayā hai

kabhī hujūm-e-alam meñ bhī muskurāyā huuñ

kabhī ḳhushī ke bhī aalam meñ jī bhar aayā hai

anīs-e-dard-e-judā.ī tirā karam bhī nahīñ

tirā sitam bhī to rah-rah ke yaad aayā hai

udaas dekh ke mujh ko udaas baiThe haiñ

tamām umr kā ġham aaj raas aayā hai

‘shamīm’ mauj o talātum se kyā gila kiije

safīna ain kināre pe Dagmagāyā hai

Leave a Comment