Shamim Jaipuri
zara bhi jis ki vafa ka yaqin aaya hai
qasam ḳhuda ki usi se fareb khaya hai
har ek kafir-o-momin ke kaam aaya hai
vo har maqam jahan main ne sar jhukaya hai
bahut ghurur tha hosh-o-havas par lekin
nazar jab un se mili hai to hosh aaya hai
kabhi hujum-e-alam men bhi muskuraya huun
kabhi ḳhushi ke bhi aalam men ji bhar aaya hai
anis-e-dard-e-juda.i tira karam bhi nahin
tira sitam bhi to rah-rah ke yaad aaya hai
udaas dekh ke mujh ko udaas baiThe hain
tamam umr ka gham aaj raas aaya hai
‘shamim’ mauj o talatum se kya gila kiije
safina ain kinare pe Dagmagaya hai
Leave a Reply