deti hain thapkiyan tiri parchha.iyan mujhe
rashk-e-bahisht hain miri tanha.iyan mujhe
mere nasib men sahi ah-o-fughan magar
ab to suna.i deti hain shahna.iyan mujhe
kitne uruuj par hai mire ishq ka vaqar
hasil hain ku-e-yar ki rusva.iyan mujhe
maa.il hai chashm-e-mast idhar lag raha hai ab
avaz dengi jhiil ki gahra.iyan mujhe
qaa.em hai mere dard ka ab tak vahi bharam
ab bhi salam karti hain purva.iyan mujhe
is daur-e-sarkashi ki kashakash ke darmiyan
lagti hai pur-sukun jabin-sa.iyan mujhe
jo the ḳharab vo to bulandi pe hain ‘alim’
pasti men le ga.iin miri achchha.iyan mujhe
Leave a Reply