aks TuuTa hai barha mera
sang-e-ḳhara hai aa.ina mera
saari duniya miri muḳhalif hai
ek bachcha hai ham-nava mera
tez barish ka main parinda huun
badalon men hai ghonsla mera
ghar men mehman hui hai tanha.i
bhar gaya hai bar-amda mera
do charaghon se raat raushan hai
ek tera hai dusra mera
uupar uupar se Thiik lagta hai
zaḳhm andar se hai hara mera
puchh lena kisi parinde se
sab ko ma.alum hai pata mera
meri tarkib men hai sachcha.i
kaun chakkhega za.iqa mera
kone-khudre bhi ḳhuub raushan hain
hujra-e-zat hai khula mera
hone lagti hai baat jab ḳhud se
TuuT jaata hai rabta mera
kisi manzil ki yaad aate hi
chalne lagta hai naqsh-e-pa mera
ek parkar ke simaTte hi
phail jaata hai da.era mera
ek Thokar se TuuT ja.ega
jism-e-fani hai bhurbhura mera
tum zaminon ko napte rahna
ka.enati hai fasla mera
thak ke vapas chala gaya ‘nasir’
ain manzil se rasta mera
Leave a Reply