Wali Alam Shaheen
kisi men taab na thi tohmaten uThane ki
jale charagh to palken jhukin zamane ki
jise bhi dekhiye apni ana ka maara hai
umiid kis se rakhe koi daad paane ki
tiri gali men bhi dar-o-rasan ka charcha hai
badal ga.i hai hava kis qadar zamane ki
charagh-e-kushta ki manind nauha-ḳhvan ye log
bane hain surḳhi-e-aghaz kis fasane ki
larazte hathon men saz-e-shikasta kis ne liya
ki jaise Duub ga.i nabz ik zamane ki
fasana sharh-talab is qadar na tha lekin
kahan kahan na uḌi ḳhaak ashiyane ki
kuchh aur ho ga.e ‘shahin’ zaḳhm-e-dil taaza
vo meri sa.i-e-pareshan unhen bhulane ki
Leave a Reply