Baja Ki Darpai-E-Azar Chashm-E-Tar Hai Bahut

Tauseef Tabassum

baja ki darpai-e-azar chashm-e-tar hai bahut

palaT ke a.unga main garche ye safar hai bahut

Thahar sako to Thahar jaao mere pahlu men

vo dhuup hai ki yahi saya-e-shajar hai bahut

darida bahen ḳhizan men pukarti hain chalo

hava-e-tund men har shaḳh be-sipar hai bahut

kahun to vo miri rudad-e-dard bhi na sune

ki jaise us ko mire haal ki ḳhabar hai bahut

kali ḳhumar ke aalam men kasmasati hai

khuli hai aankh magar niind ka asar hai bahut

mira qadam hi nahin hijr men bagula-sifat

bichhaḌ ke mujh se tira gham bhi dar-ba-dar hai bahut

hain muntazir ki ye dariya-e-dard kab utre

hain ḳhush ki dil ka safina to mauj par hai bahut

na ḳhalvat-e-gham-e-duniya na bazm-e-jan ‘tausif’

tumhare vaste ik bekasi ka ghar hai bahut