Swapnil Tiwari
dil zaban zehn mire aaj sanvarna chahen
sab ke sab sirf tiri baat hi karna chahen
daagh hain ham tire daman ke so ziddi bhi hain
ham koi rang nahin hain ki utarna chahen
aarzu hai hamen sahra ki so hain bhi sairab
ḳhushk ho jaa.en ham ik pal men jo jharna chahen
ye badan hai tira ye aam sa rasta to nahin
is ke har moḌ pe ham sadiyon Thaharna chahen
ye sahar hai to bhala chahiye kis ko ye ki ham
shab ki divar se sar phoḌ ke marna chahen
jaise so.e hue paani men utarta hai saanp
ham bhi chup-chap tire dil men utarna chahen
aam se shaḳhs ke lagte hain yuun to tere paanv
saare dariya hi jinhen chhu ke guzarna chahen
chahte hain ki kabhi zikr hamara vo karen
ham bhi bahte hue paani pe Thaharna chahen
naam aaya hai tira jab se gunahgaron men
sab gavah apni gavahi se mukarna chahen
vasl aur hijr ke dariya men vahi utren jo
is taraf Duub ke us or ubharna chahen
koi aa.ega nahin TukḌe hamare chunne
ham isi jism ke andar hi bikharna chahen
Leave a Reply