mohabbat ko riya ki qaid se azad karna hai
hamen phir arzuon ka nagar abad karna hai
shikast-e-fash deni hai man-o-tu ke ravayyon ko
marasim ki bahali ka hunar ijad karna hai
ye kya jabr-e-taalluq hai ki phir tere havale se
kisi ko bhuul jaana hai kisi ko yaad rakhna hai
guzishta ahd men bhi jurm tha ye kar-e-haq-goi
hamari nasl ko bhi ye ba-sad uftad karna hai
kai digar havale bhi surur-o-rahat-e-dil hain
gae mausam ki nisbat se tumhen bhi yaad karna hai
hamare sher agar jazbon ko khushbu de nahin sakte
to phir to sher kahna vaqt ko barbad karna hai
Leave a Reply