Kucha-Ha-E-Dil-O-Jaan Ki Tira-Shabo Aas Marti Nahin

Seemab Zafar

kucha-ha-e-dil-o-jan ki tira-shabo aas marti nahin

aḳhiri saans bharte sitaro suno aas marti nahin

chashm-e-giryan zara tham bhi ja ashk men dil bhi bah ja.ega

sabr sahra-e-vahshat ke matam-garo aas marti nahin

dard uThne se dil ke sharare kahan bujh sake hain kabhi

laakh raushan nigahon men ḳhuun la bharo aas marti nahin

vali-e-shahr naghmon ka qatil baja par hamen gham hai kya

fikr zinda ho jab tak mire sha.iro aas marti nahin

tum se pahle bhi ḳhvabon ki gardan uḌane baḌe aa.e the

sar kaTe ḳhvab chilla uThe dosto aas marti nahin

raakh bin jal bujhe par ye dil se dhuan ab bhi uThta hai kyuun

aankh men dekhne ki sakat ho na ho aas marti nahin