Hafeez Jaunpuri
yuun uTha de hamare ji se gharaz
ho na tere siva kisi se gharaz
vo mana.ega jis se ruThe ho
ham ko minnat se ajizi se gharaz
ye bhi ehsan hai qana.at ka
apni aTki nahin kisi se gharaz
ye mahal bhi maqam-e-ibrat hai
aadmi ko ho aadmi se gharaz
dard-mandon ko kya dava se kaam
gham-nasibon ko kya ḳhushi se gharaz
husn ara.ishon ka ho muhtaj
us ko a.ine aarsi se gharaz
chuur hain nashsha-e-mohabbat men
mai se matlab na mai-kashi se gharaz
der tak diid ke maze luuTe
ḳhuub nikli ye be-ḳhudi se gharaz
be-niyazi ki shaan hi ye nahin
us ko bandon ki bandi se gharaz
teri ḳhatir aziiz hai varna
mujh ko dushman ki dosti se gharaz
ham mohabbat ke bande hain vaa.iz
ham ko kya bahs maz.habi se gharaz
dair ho ka.aba ho kalisa ho
us ki dhun us ki bandagi se gharaz
shaiḳh ko is qadar pilate kyuun
mai-kashon ko thi dil-lagi se gharaz
us ko samjho na hazz-e-nafs ‘hafiz’
aur hi kuchh hai sha.iri se gharaz
Leave a Reply