iqrar-e-vafa ummid-e-karam kuchh kah na sake kuchh bhuul ga.e
va.ade vo tire mub.ham mub.ham kuchh kah na sake kuchh bhuul ga.e
sarshari-e-ulfat ka aalam kuchh kah na sake kuchh bhuul ga.e
jazbat ki vo dhimi sargam kuchh kah na sake kuchh bhuul ga.e
alam ki vo yurish paiham kuchh kah na sake kuchh bhuul ga.e
Duubi hui nabzon ka aalam kuchh kah na sake kuchh bhuul ga.e
yadon ki ḳhalish vo sham-o-sahar mayus se vo divar-o-dar
ehsas ki lau maddham maddham kuchh kah na sake kuchh bhuul ga.e
kya vahm-o-guman kya ilm-o-yaqin kya fikr-o-gham-e-duniya-o-din
hasti ke vo saare pech-o-ḳham kuchh kah na sake kuchh bhuul ga.e
vo sher-e-mujassam jan-e-suḳhan har saans men yuun hai naghma-zan
afsana-e-gham rudad-e-alam kuchh kah na sake kuchh bhuul ga.e
kab daur-e-ḳhizan aaya aur kab ruḳhsat vo gul-e-ra.ana.i hua
mahrumi-e-jan majburi-e-gham kuchh kah na sake kuchh bhuul ga.e
dil aise purane paapi ko kya kaam hai din-o-iman se
vo saz-e-kalisa soz-e-haram kuchh kah na sake kuchh bhuul ga.e
unvan yahi Thahre ‘sarvar’ afsana-e-hasti ke tere
ya qalb-e-hazin ya dida-e-nam kuchh kah na sake kuchh bhuul ga.e
Leave a Reply