na gul men na ab gulsitan hi men DhunDo
mohabbat ko bas astan hi men DhunDo
nishani mohabbat ki tum ko milegi
kisi ek dhundle nishan hi men DhunDo
pata shahr-e-dil ki baharon ka ab tum
kahin bam-o-dar ki khizan hi men DhunDo
agar DhunDhna hai vajud apna tum ko
kisi dil ke ujde makan hi men DhunDo
milegi andhere men ujli kiran bhi
use soch ki kahkashan hi men DhunDo
vafa ki kahani men DhunDo mujhe tum
kabhi hijr ki dastan hi men DhunDo
ho jis par yaqin tum ko ‘shahin’ azal se
use apne vahm-o-guman hi men DhunDo