Nivesh Sahu
ghanimat hai kisi ke sar nahin huun
abhi tak ghar se main be-ghar nahin huun
abhi divar se guzra to jaana
main apne jism ke andar nahin huun
ye achchhi baat hai tum samne ho
main ya.ani ḳhvab se bahar nahin huun
main charon or se huun band kamra
faqat divar huun main dar nahin huun
agar hota to ḳhud ko phir banata
magar afsos kuza-gar nahin huun
samundar suukh jaane par mila huun
magar malva huun bas gauhar nahin huun
main sukha dasht huun aur dasht aisa
kisi bhi janvar ka ghar nahin huun
Leave a Reply