shahr men jab bhi zuleḳha se ḳharidar aa.e
kitne yusuf the ki ḳhud hi sar-e-bazar aa.e
chheḌ di qamat-o-gesu ki hikayat ham ne
kisi surat se to zikr-e-rasan-o-dar aa.e
jab bhi zindan men asiron ko mila muzhda-e-gul
meri nazron men tumhare lab-o-ruḳhsar aa.e
dusri rah-e-vafa men koi manzil hi na thi
jo tiri bazm se uTThe vo sar-e-dar aa.e
jab kya tark-e-tamanna ka irada ham ne
samne kitne hi TuuTe hue pindar aa.e
hosh-mandon ne saja li gham-e-dil ki mahfil
ham se divane sar-e-anjuman-e-dar aa.e
ham se sikhe koi adab qadah-noshi ke
ham ki maiḳhane men ghafil ga.e hoshiyar aa.e
ghaur se dekh suḳhan-fahmon ke chehre ‘sarshar’
kitne is shakl men ‘ghalib’ ke taraf-dar aa.e
Leave a Reply