Shamim Jaipuri
jo hans hans ke har gham gavara kare hai
ye himmat bhi ik gham ka maara kare hai
kinara bhi jis se kinara kare hai
madad us ki tufan ka dhara kare hai
jo dair-o-haram se kinara kare hai
har ik shai men tera nazzara kare hai
paḌa hai jo divana teri gali men
ḳhuda jaane kis ko pukara kare hai
tire saath hans kar guzari hai jis ne
vo ab ansuon par guzara kare hai
ḳhuda us ke daman ko phulon se bhar de
mujhe pattharon se jo maara kare hai
taghaful se chhupti nahin hai mohabbat
taghaful to aur ashkara kare hai
‘shamim’ us ne sahil pe mujh ko Duboya
jo Duube huon ko ubhara kare hai
Leave a Reply