Hari Chand Akhtar
jis zamin par tira naqsh-e-kaf-e-pa hota hai
ek ik zarra vahan qibla-numa hota hai
kaash vo dil pe rakhe haath aur itna puchhe
kyuun taḌap uThta hai kya baat hai kya hota hai
bazm-e-dushman hai ḳhuda ke liye aram se baiTh
baar baar ai dil-e-nadan tujhe kya hota hai
meri surat miri halat miri rangat dekhi
aap ne dekh liya ishq men kya hota hai
ai saba ḳhar-e-mughilan ko suna de muzhda
azim-e-dasht koi abla-pa hota hai
ham jo kahte hain hamesha hi ghalat kahte hain
aap ka hukm durust aur baja hota hai
Leave a Reply