rah-e-vafa men unhin ki khushi ki baat karo
vo zindagi hain to phir zindagi ki baat karo
fughan-e-nim-shabi ziist tak rahe qaaem
hayat soz-e-jigar hai isi ki baat karo
nizam-e-husn se vaqif ho phir vafa kaisi
unhin pe mit ke nai zindagi ki baat karo
zaban-e-qal ko de kar sukut ka paigham
zaban-e-hal se paiham usi ki baat karo
karam hai un ka jo ho jaae ‘vasil’-e-janan
vahan khudi ki na kuchh be-khudi ki baat karo
Leave a Reply