dil men vo dard uTha raat ki ham so na sake
aise bikhre the ḳhayalat ki ham so na sake
thapkiyan dete rahe ThanDi hava ke jhonke
is qadar jal uThe jazbat ki ham so na sake
ankhen takti rahin takti rahin aur thak bhi ga.iin
ha.e-re pas-e-rivayat ki ham so na sake
ye bhi sach hai ki na hushiyar na bedar the ham
ye bhi sachchi hai magar baat ki ham so na sake
ek do pal ke liye ham ko ata ho jaa.e
niind ai qibla-e-hajat ki ham so na sake
saz-e-dauran pe kuchh is tarah se angusht-e-hayat
chheḌti jaati thi naghmat ki ham so na sake
ek sannaTa tha avaz na thi aur na javab
dil men itne the savalat ki ham so na sake
jhilmilate rahe tarik shabistan ke pare
aise biite hue lamhat ki ham so na sake
raat bhar dasht-e-tasavvur men bhaTakte hi rahe
jaane kya un se hui baat ki ham so na sake
umr bhar yuun to ‘tamanna.i’ rahe tesha-ba-kaf
itni sangin thi har raat ki ham so na sake
Leave a Reply