dil-e-muztar ko samjha luun bahut hai
main ḳhud se apna ghar chhalun bahut hai
main apni zindgi-e-bevafa ko
vafa ke jaam men Dhalun bahut hai
bhigo kar ansuon se apna chehra
safar ki gard dho Dalun bahut hai
sukut-e-anjuman TuuTe na TuuTe
ba-shauq-e-zamzama ga luun bahut hai
navah-e-zindagi men ik zara sa
fareb-e-dosti kha luun bahut hai
koi bhula sabaq parina qissa
main dil hi dil men dohra luun bahut hai
na jaa.e ra.egan zauq-e-tajassus
main apne aap ko pa luun bahut hai
jo sang-e-mil rahzan ke liye hai
vo sang-e-rah uThva luun bahut hai
‘saba’ divar-e-zindan-e-bala se
main apne sar ko Takra luun bahut hai
Leave a Reply