intiha-e-ishq ho yuun ishq men kamil bano
ḳhaak ho kar bhi nishan-e-sarhad-e-manzil bano
mere shikvon par ye kahna rahm ke qabil bano
mudda.a ye hai ki apne haal se ghafil bano
gharq ho kar rol lo moti ḳhud apne vaste
Duub kar ubhro to auron ke liye sahil bano
anjuman kaisi tum apni zaat se ho anjuman
gosha-e-ḳhalvat men bhi baiTho to ik mahfil bano
husn-e-ḳhud-bin mo.ajizat-e-ishq ka qaa.il nahin
qatra-ha-e-ashk-e-ḳhunin jam.a ho kar dil bano
saath azadi ke ḳhud-dari bhi rahna chahiye
bahr-e-be-payan kabhi lab ḳhushki-e-sahil bano
ilm ka daura lahu ke saath rag rag men rahe
jauhar-e-qabil agar ho quvvat-e-amil bano
sharm se tum ko simaTna hai to simTo husn se
dil men ban jaao suvaida putliyon men til bano
rabt-e-batin kya suno tafsil us ijmal ki
ham sarapa dard hon aur tum sarapa dil bano
jalne vaalo ta-ba-imkan zabt soz-e-gham karo
aag jab bhaḌke charagh-e-sarhad-e-manzil bano
kuchh dinon baiTho sar-e-qabr-e-‘aziz’-e-be-nava
ḳhanqahon men bahut dushvar hai kamil bano
Leave a Reply