Sabir
ahista boliyega tamasha khaḌa na ho
bairun-e-ḳhvab koi hamen sun raha na ho
divaren uTh ga.i na hon dasht-e-junun men
ram-ḳhurda vo ghazal kahin gum-shuda na ho
raḳht-e-safar men bandh len pur-shor kuchh bhanvar
dariya hai pur-sukun safar be-maza na ho
yuun to vo ek aam sa patthar hai miil ka
lekin vahan se aage agar rasta na ho
masjid pukarti rahi hayya-alal-falah
jaise hamara apna koi falsafa na ho
ham kaaT denge umr ki zanjir ek din
ham-zad karb-e-did se shayad riha na ho
ik chand mujh ko takta rahta hai in dinon
jaise siva.e mere koi a.ina na ho
hans hans ke us se baten kiye ja rahe ho tum
‘sabir’ vo dil men aur hi kuchh sochta na ho
Leave a Reply