DhunD len ham ko hamari jo ḳhabar rakhte hain
ham ko dekhen vo agar husn-e-nazar rakhte hain
vaqif-e-rah hain manzil ki ḳhabar rakhte hain
kuchh samajh soch ke ham azm-e-safar rakhte hain
aankh ko vaqf-e-sar-e-rahguzar rakhte hain
ḳhaak hone ke liye zauq-e-nazar rakhte hain
ishq aur ishq men ik shan-e-asar rakhte hain
husn ki aankh mohabbat ki nazar rakhte hain
ab vo ankhon se samajh lete hain hasrat dil ki
chashm-e-bad-dur nigahon pe nazar rakhte hain
un ke jalvon ki haqiqat to unhin se puchho
ham to bijli ke chamakne ki ḳhabar rakhte hain
ik kashish hai ki jo khinche liye jaati hai hamen
varna divane bhi manzil ki ḳhabar rakhte hain
dur-andeshi-e-ulfat ne kiya hai mohtat
ham nigahon men tiri rahguzar rakhte hain
ek markaz pe simaT aa.i hai duniya-e-jamal
kis ki tasvir ko ham pesh-e-nazar rakhte hain
dil-lagi ishq ki hai husn ka sanjida mazaq
ham ko dhoka hai ki ham dard-e-jigar rakhte hain
dekh lenge tire jalve bhi jo fursat hogi
ham abhi dil ki tajalli pe nazar rakhte hain
adab-e-husn hai varna ye mohabbat vaale
sehr ankhon men ḳhayalon men asar rakhte hain
aaj kis bazm men le aa.i hai taqdir ‘munir’
ki farishte bhi mire samne sar rakhte hain
Leave a Reply