pirzada-qasim

Khizan Mausam Nahin Hai

khizan mausam nahin hai

ek lamha hai ki jis ki aarzu men

sabz patte

hava ki ahaton par kaan dharte hain

guzarte vaqt men saat-ba-saat

nae pairahanon men

gulabi aur gahre surkh unnabi

dahakte khushnuma rangon se le kar zard hone tak

kabhi dhime kabhi unche suron men baat karti

khushbuon men bas-basa kar

hava ke saath mahv-e-raqs hona chahte hain

zamin ka rizq ban jaane se pahle

vahi ik ajnabi varaftagi aur raqs ka lamha

kahin par daur-e-ainda ke mausam ki samaat men

kisi soe hue ik biij men

khvahish numu ki sar uthati hai

bahut hi pyaar se har shakh ke patte se kahti hai

ki ab rizq-e-zamin ban kar

kisi ik narm konpal ki numu ka aasra ban ja

khizan mausam nahin hai

ik masarrat-khez takhliq-e-amal ka aasra hai

More Poems

Leave a Comment