aaj tak us ki mohabbat ka nasha taari hai
phuul baaqi nahin ḳhushbu ka safar jaari hai
sehr lagta hai pasine men nahaya hua jism
ye ajab niind men Duubi hui bedari hai
aaj ka phuul tiri kokh se zahir hoga
shaḳh-e-dil ḳhushk na ho ab ke tiri baai hai
dhyan bhi us ka hai milte bhi nahin hain us se
jism se bair hai saa.e se vafa-dari hai
dil ko tanha.i ka ehsas bhi baaqi na raha
vo bhi dhundla ga.i jo shakl bahut pyari hai
is tag-o-taz men TuuTe hain sitare kitne
asman jiit saka hai na zamin haari hai
koi aaya hai zara aankh to kholo ‘shahzad’
abhi jaage the abhi sone ki tayyari hai
Leave a Reply