Aaj Tak Uski Mohabbat Ka Nasha Tari Hai

aaj tak us kī mohabbat kā nasha taarī hai

phuul baaqī nahīñ ḳhushbū kā safar jaarī hai

sehr lagtā hai pasīne meñ nahāyā huā jism

ye ajab niiñd meñ Duubī huī bedārī hai

aaj kā phuul tirī kokh se zāhir hogā

shāḳh-e-dil ḳhushk na ho ab ke tirī baaī hai

dhyān bhī us kā hai milte bhī nahīñ haiñ us se

jism se bair hai saa.e se vafā-dārī hai

dil ko tanhā.ī kā ehsās bhī baaqī na rahā

vo bhī dhundlā ga.ī jo shakl bahut pyārī hai

is tag-o-tāz meñ TuuTe haiñ sitāre kitne

āsmāñ jiit sakā hai na zamīñ haarī hai

koī aayā hai zarā aañkh to kholo ‘shahzād’

abhī jaage the abhī sone kī tayyārī hai

Leave a Comment