Kuchh Is Tarah Se Nazar Se Guzar Gaya Koi

Hafeez Hoshiarpuri

kuchh is tarah se nazar se guzar gaya koi

ki dil ko gham ka saza-var kar gaya koi

dil-e-sitam-zada ko jaise kuchh hua hi nahin

ḳhud apne husn se yuun be-ḳhabar gaya koi

vo ek jalva-e-sad-rang ik hujum-e-bahar

na jaane kaun tha jaane kidhar gaya koi

nazar ki tishna-e-didar thi rahi mahrum

nazar uTha.i to dil men utar gaya koi

nigah-e-shauq ki mahrumiyon se na-vaqif

nigah-e-shauq pe ilzam dhar gaya koi

ab un ke husn men husn-e-nazar bhi shamil hai

kuchh aur meri nazar se sanvar gaya koi

kisi ke paanv ki aahaT ki dil ki dhaḌkan thi

hazar baar uTha su-e-dar gaya koi

nasib-e-ahl-e-vafa ye sukun-e-dil to na tha

zarur nala-e-dil be-asar gaya koi

uTha phir aaj mire dil men rashk ka tufan

phir un ki raah se ba-chashm-e-tar gaya koi

ye kah ke yaad karenge ‘hafiz’ dost mujhe

vafa ki rasm ko pa.inda kar gaya koi