jaga sake na tire lab lakir aisi thi
hamare bakht ki rekha bhi ‘mir’ aisi thi
ye haath chume gae phir bhi be-gulab rahe
jo rut bhi aai khizan ki safir aisi thi
vo mere paanv ko chhune jhuka tha jis lamhe
jo mangta use deti amiir aisi thi
shahadaten mire haq men tamam jaati thiin
magar khamosh the munsif nazir aisi thi
katar ke jaal bhi sayyad ki raza ke baghair
tamam umr na udti asiir aisi thi
phir us ke baad na dekhe visal ke mausam
judaiyon ki ghadi chashm-gir aisi thi
bas ik nigah mujhe dekhta chala jaata
us aadmi ki mohabbat faqir aisi thi
rida ke saath lutere ko zad-e-rah bhi diya
tiri farakh-dili mere viir aisi thi
kabhi na chahne valon ka khun-baha manga
nigar-e-shahr-e-sukhan be-zamir aisi thi
Leave a Reply