Saghar Nizami
naghme hava ne chheḌe fitrat ki bansuri men
paida huiin zabanen jangal ki ḳhamushi men
us vaqt ki udasi hai dekhne ke qabil
jab koi ro raha ho afsurda chandni men
kuchh to latif hotin ghaḌiyan musibaton ki
tum ek din to milte do din ki zindagi men
hangama-e-tabassum hai meri har ḳhamoshi
tum muskura rahe ho dil ki shaguftagi men
ḳhali paḌe hue hain phulon ke sab sahife
raz-e-chaman nihan hai kaliyon ki ḳhamushi men
Leave a Reply